Қазақстан Республикасының президенті жаңа құрылыс кодексіне қол қойды
Сонымен қатар Қазақстан Республикасының «Сәулет, қала құрылысы және құрылыс мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» Заңы қабылданып, оған қол қойылды. Құжаттардың мәтіндері ресми баспа басылымдарында жарияланады.
Құрылыс саласы үшін негізгі өзгерістер
Жаңа Құрылыс кодексі нарық қатысушыларының ашықтығын, қауіпсіздігін және жауапкершілігін арттыруға бағытталған кешенді нормаларды енгізеді. Атап айтқанда:
қалалар мен елді мекендердің бас жоспарлары мен егжей-тегжейлі жоспарлау құжаттарына өзгерістер екі жылда бір реттен жиі емес енгізілуі мүмкін, бұл ретсіз және бейберекет құрылыс тәуекелдерін төмендетуге бағытталған;
сейсмикалық қауіпсіздік талаптары міндетті сипатқа ие болады — жобалау барысында сейсмикалық микрoаудандастыру карталары қолданылады, ал ғимараттарға сейсмикалық тәуекелді бағалау паспорттары беріледі;
қала құрылысы кадастры жүйесімен интеграцияланған бірыңғай цифрлық құрылыс порталы құрылады;
сәулет-құрылыс бақылау органдарының өкілеттіктері күшейтіледі, оның ішінде жоспардан тыс тексерулер нәтижелері бойынша жедел шаралар қабылдау мүмкіндігі қарастырылады;
сарапшыларды міндетті сертификаттау және құрылысшылардың бірыңғай цифрлық тізілімі енгізіледі;
барлық құрылыс нысандары жүйелі мониторингке алынады.
Мердігерлердің жауапкершілігіне ерекше назар аударылады: күрделі нысандар үшін «кілт тапсыру» қағидаты бойынша құрылыс жүргізу және барлық жауапкершілікті бір орындаушының өз мойнына алуы міндетті болады. Сонымен қатар ғимараттарға берілетін кепілдік мерзімі ұлғайтылады және пайдалануға берілгеннен кейін олардың техникалық жағдайына тұрақты тексерулер жүргізу көзделеді.
Кәсіби қауымдастық үшін маңызы
Жаңа Құрылыс кодексінің қабылдануы бүкіл құрылыс саласы үшін бірыңғай әрі ашық ережелерді қалыптастырады, сапаға, қауіпсіздікке және процестерді цифрландыруға қойылатын талаптарды күшейтеді, сондай-ақ нарықтың дамуына арналған жаңа реттеуші негізді айқындайды.
Жаңа Құрылыс кодексі сала үшін жаңартылған жұмыс қағидаларын белгілеп, кәсіби қауымдастық үшін маңызды бағдарға айналады.