Қазақстанда Энергетиктер күні 22 желтоқсанға ресми түрде бекітілуі мүмкін

Қазақстанда кәсіби мерекелер тізіміне өзгерістер енгізілмек — Энергетиктер күні ресми мәртебе мен нақты күнге ие болуы мүмкін.

Бұл туралы ҚР Еңбек және халықты әлеуметтік қорғау вице-министрі Асқар Бияхметов мәлімдеді. Оның айтуынша, тиісті бұйрық жобасы әзірленіп, Әділет министрлігінің келісіміне жолданған. Жаңа ресми күн ретінде 22 желтоқсан белгіленбек.

Қазіргі таңда Энергетиктер күні елімізде жыл сайын желтоқсанның үшінші жексенбісінде бейресми түрде атап өтіледі. Мерекені 22 желтоқсанға ауыстыру — оны күнтізбеде тұрақты және ресми етуге мүмкіндік береді. Бұл тәжірибе ТМД елдерінде де кеңінен қолданылады.

Сарапшылардың пікірінше, нақты күнге көшу — энергетика саласы қызметкерлерінің еңбегіне деген құрметті арттырып, мерекені біріздендіруге сеп болады. Бұл әсіресе Қазақстандағы энергетика секторының белсенді дамып келе жатқан кезеңінде өзекті.

Егер бұйрық жобасы мақұлданса, Энергетиктер күні Қазақстанда биылдан бастап жыл сайын 22 желтоқсанда ресми түрде тойланатын болады.